طبعا مافيش مرة ركبت الميكروباص الا ويتحفنا السواق باحد الحسنيين اقصد التحفتين اللى مفروضين علينا اما شريط اغانى شعبية تشرح القلب الحزين :) على شاكلة المولد وانا مش عارفنى والموسيقى المعفرتة دى و هيييييييييييييه وده مقدور عليه ممكن تطلب منه انه يوطيه شوية بس طبعا تبقى مشكلة كبرى لو كان مشغل احدى شرايط شيوخ السلفية بارئها المتطرفة فى الدنيا والدين ساعتها لو طلبت منه انه يوطيها ينظر لك شزرا وياكل جزرا ( عشان يسن سنانه استعداد للمعركة) ويقولك باعلى صوت : كلام ربنا اوطيه ليه ؟؟؟ مش عاجبك انزل
طبعا يا بتضطر تنزل من الميكروباص او غصب عنك بتسمع المواعظ المتشددة دى وتتعجب من الكلام اللى بيتقال وده بيت القصيد اكتر شئ استفزني وبشدة النظرة السلفية للمرأة وازاى بيتفننوا فى تهميش دورها وتحويلها لمجرد تابع مطيع طاعة عمياء للرجل وكأنها دونه فى المستوى॥ فى مرة من مرات مغامراتى الميكروباصية سمعت الشيخ العتيد يصرخ بصوته الجهورى ويقول : ان الست لازم تسمع كلام جوزها وتطيعه طاعة عمياء وتلبى رغباته متى شاء ( على اساس انها جارية عند اهله ) عشان تدخل الجنة ولازم تأدى واجبها تجاهه وتجاهد وجهادها انها تختار لجوزها الزوجة التانية والتالتة والرابعة ( يا ماشاء الله ) وانها فتنة ولازم تبقى فى البيت تربى الاولاد وماتزاحمش الرجالة فى الشغل حفاظا عليها من الفتن والشبهات وتتنقب لان النقاب عفة وطهارة ..... طبعا ماصدقت انى انزل فى محطتى قبل ما يطير اخر برج عندي ... كلامه صدمنى بجد ايه ده؟ بتقول ايه؟
ايه الكلام ده ؟ حد عاقل يقدر يتقبل كلام زى كده؟ ده كلام يرضى ربنا ؟
نفسى افهم على اى اساس بيتكلم؟ وازاى الناس دى ماحدش بيوقفها عند حدها ؟
المرأة اللى انصفها الاسلام وكرمها الله- عز وجل- وصان لها انسانيتها يجى عليها اليوم اللى تتشوه فيه صورتها ويتحط من كرامتها ويتهدر انسانيتها وانوثتها وتعود لعصور الجاهلية وتصبح فى منزلة ادنى من الرجل ويتلغى عقلها وتبقى عفتها مرتبطة بمظهرها وقطعة القماشة اللى على وشها وراسها ؟ بدل ما تكون عفتها فى اخلاقها .. منتهى التخف والرجعية !!!!
المشكلة ان الكلام ده بيلاقى اللى بيسمعله وينفذه الفكر السلفى سيطر على عقول البسطاء باساليب الترهيب والترغيب وقدر يرسى دعائم الوهابية فى عقول ونفوس الاجيال الجديدة واسسها على تهميش دور نصف المجتمع بالدعوة للعودة للمنزل والاحتجاب القهرى ماديا ومعنويا وممارسة اسؤا انواع الضغوط القهرية لتحويلها لكائن بليد مالوش دور غير انه وعاء لانجاب الاولاد ...
ارحمونا بقى .... ارحموا طفلة صغيرة لبستوها الحجاب قهرا وسرقتوا منها هويتها كطفلة بريئة وسطحتوا تفكيرها من صغرها بدل ما تعلموها ازاى تكون انسان اولا وعقلا ثانيا وانثى ثالثا ثم اى شئ بعد ذلك
المجتمع المصرى بيمر باصعب غزو ثقافى مر عليه بيهدم قيم الوسطية المصرية الجميلة وبيرسى قواعد التخلف و الرجعية والعودة لعصر الحريم
ياترى هنفضل لامتى ساكتين ؟ ولحد امتى هنسيب الحبل عالغارب للوهابية وانصارها ؟ياترى امتى هنفوق ؟؟ و.... للحديث بقية
5 comments:
النسااااااااااااءووو فتتتتتنة
ههههههههه
بوست جميل يا فتافيت
وانا فعلا يبحان الله لسة كنت بكتب في حاجة زي كده
حبعتهالك أول ما أنشرها
إحنا داخلين على منعطف تاريخي
عشان لما المنتقبات يدخلوا فنون جميلة ويكون رأيهم إن الرسم حرام والنحت حرام وقلة أدب وسفالة ده يلخص لنا الموقف كله
التخلف والإزدواجية
تحياتي البالغة
يا ريت عصر الحريم يرجع هو حد يطول تبقى الست مصونة وقاعدة فى بيتهاوبعدين هو كل حاجة تحصل فى البلد دى تحطوها
على شماعة السلفية اتقوا ربنا البلد فى زمن فتن وكله بسبب الستات
الست مالهاش غير بيتها وبس
حسبى الله ونعم الوكيل
اشرووف الجميل
اخيراا مشرف مدونتى المتواضعة
انت فعلا عندك حق اننا داخلين على منعطف تاريخى ده اذا ما كناش دخلناه اصلا
تصور فىقسم النحت بكلية فنون جميلة مافيش غير 3 طلاب وبس ؟ بنتين وولد وتسأل ليه يقولوا النحت حرام
طيب دخلتو فنون ليه اصلا ؟؟؟
تخلف وازدواجية ورؤية مشوشة وفهم خاطئ للامور حاجة غبية جداا
الفن اللى طول عمره رمز للجمال جه الوقت اللى يبقى فيه رمز لقلة الادب والحرام
ربنا يسترها معانا
وفى انتظار البوست الجديد :)
تحياتى
مع احترامى لرأى صاحب التعليق اللى مش كاتب اسمه
الاانااختلف معاك تماما لان دى رؤية قاصرة للموضوع ازاى بتطالب بان نص المجتمع يتعطل ويقعد فى البيت ماتنساش حضرتك انه فيه الست المعيلة المسئولة عن اسرتها
وبعدين السلفية والفكر الوهابى مسئولين بالفعل عن حال المجتمع المصرى حاليا التفكك ورفض الرأى الاخر وتكفير المخالفين فى بعض الاوقات ده كله فكر متخلف وارد على مجتمعنا
والله كلام زين ... بس انا لا اعتقد انه اى شيخ سواء كان سلفي او غير سلفي يقصد كده لانه لا من العقل ولا المنطق انه يتكلم عن جزء اساسي فى المجتمع اللى بنعيش فيه بالطريقه ديه ولكن انا شايف ان المشكله الكبري هى فى الأسلوب الدعوي نفسه هو اللى بيخلى اللى قاعد بيسمع المحاضره يفهم كده ... انا عارف انه كتير من الناس او اقصد الدعاه بأسلوبهم الغليظ بيوصلوا للناس معلومات غير مفصوده ... وبيتعمدوا يستخدموا الاسلوب ده ..إيمانا منهم بأنه هو ده الاسلوب الصح وكتير من الدعاه بيستخدم الأسلوب الرقيق إيمانا منهم انه هو ده الصح وانا فى رأيي الشخصي لا ده ولا ده نافعين لأن الاتنين بيأثروا فى الناس تأثير وفتي لا اكتر ولا اقل ولكن الداعيه اللى يخاطب العقل هو اللى بيثبت معلومته عند تلاميذه او مستمعيه .. لكن لو الأمر بالأسلوب المنفر ده فأنا اظن انه هينتج عند الناس نفور من اللى بيتعرض عليهم من قبل ما يسمعوه اصلا ...
شكرا للبوست
Post a Comment