اول فتفوتة

اتأخرت كثير فى كتابة اول تدوينة  ليا لأنشغالي فى الفترة الاخيرة وكل ما انوي  ادون القى نفسي مشغولة  وبعدين ما كنتش عارف اكتب ايه بالظبط  دى اول مرة ....النهارده بقى قررت ان اكسر القاعدة (او النحس  ده :) وقررت اني اكتب اللى يخطر على بالي  وزى ماتيجى تيجى ...  ولحسن الحظ كان فيه مناسبة حلوة ... افتكر انه مافيش احسن من مناسبة عيد ميلادي اللى بيوافق يوم عيد الحب عشان ابتدي  مرحلة التدوين فى حياتي
يوم 14 فبراير ده دايما كان يوم مميز ليا (لالالا ماتخلوش دماغكم  تروح لبعيد ) هو بيبقى يوم مميز عشان بقضيه مع ماما واصحابي وبعمل  حفلة معاهم بيبقوا كلهم حواليا  وبتمتع فيه باسمى انواع الحب اللى فى العلاقات الانسانية الامومة والصداقة والاخوة  بحس باحساس رائع بالسعادة والالفة والحب رغم انى ماكانش عندى ريليشن او حب فى حياتي لانها مش مقياس لسعادة الانسان  ... السعادة الحقيقية فى حب الناس والصداقات الحقيقية
السنة دي كانت اول سنة ما احتفلش بعيد ميلادي ولا اقابل اصحابي  لانى كنت بمر بظروف مش لطيفة ومر اليوم ده بكل الحزن والاسى اللى فى الدنيا لاول مرة ما افسحنيش  ولا اهدى لنفسي هدية ولا ابتسملى كان يوم فيصل (ده غير شارع فيصل ) في حياتي ووقفة طويلة مع النفس اتخذت قرارات واعددت خطط جه وقت تنفيذها ما بقاش فى وقت للانتظار
 افتكر ان كل واحد مننا محتاج يقعد مع نفسه شوية يرتب اوراقه ويشوف ايه اللى ممكن يعمله جديد ويخطط لمستقبله :) 

النهارده بعد مرور يومين على يوم ميلادي حاسة بأني احسن بكتير ... واتاكدت من حاجة جميلة قوى  

ان اى لحظة حلوة تمر على البنى ادم هى عيد حب  وبعد اذنكم بقى ...اروح افسحني 

:)
كل سنة وانتم طيبين وهابى فالنتين :)